ສູນໄອຊີທີ

ໜ້າທີ່ ແລະ ຂອບເຂດສິດ

1. ຄົ້ນຄວ້າຜັນຂະຫຍາຍແນວທາງນະໂຍບາຍ, ກົດລະບຽບ, ມະຕິ, ຄຳສັ່ງຂອງພັກ, ກົດໝາຍຂອງລັດ, ທິດທາງ, ແຜນການ ແລະ ຍຸດທະສາດຂອງກະຊວງສຶກສາທິການ ແລະ ກິລາ ເພື່ອສ້າງແຜນພັດທະນາໄອຊີທີ ສຳລັບວຽກງານການສຶກສາ, ວິທະຍາສາດ ແລະ ກິລາຂອງແຂວງ;
2. ສ້າງ ແລະ ປັບປຸງນິຕິກຳ, ລະບຽບການ ແລະ ມາດຕະຖານຕ່າງໆ ໃນການຄຸ້ມຄອງ ໄອຊີທີ ສຳລັບວຽກງານການສຶກສາ, ວິທະຍາສາດ ແລະ ກິລາພາຍໃນແຂວງ;
3. ສ້າງຄວາມເຂັ້ມແຂວງທາງດ້ານ ໄອຊີທີ ໃຫ້ແກ່ຄູ ແລະ ບຸກຄະລາກອນໃນຂະແໜງການສຶກສາທິການ ແລະ ກິລາ ໃນຂັ້ນຂອງຕົນ ໂດຍສົມທົບກັບພາກສ່ວນທີ່ກ່ຽວຂ້ອງ ຕາມການແບ່ງຂັ້ນຄຸ້ມຄອງ;
4. ພັດທະນາ, ຄຸ້ມຄອງ, ຊຸກຍູ້ ແລະ ສົ່ງເສີມ ການນຳໃຊ້ໄອຊີທີ ສຳລັບການຄຸ້ມຄອງບໍລິຫານການຮຽນ-ການສອນ ແລະ ການຄົ້ນຄວ້າວິໄຊ ຂອງຂະແໜງການສຶກສາທິການ ແລະ ກິລາພາຍໃນແຂວງ;
5. ໃຫ້ບໍລິການດ້ານວິຊາການ ໄອຊີທີ ສຳລັບວຽກການສຶກສາ, ວິທະຍາສາດ ແລະ ກິລາ ແກ່ບັນດາສະຖານການສຶກສາ ແລະ ໜ່ວຍງານອື່ນທັງພາກລັດ ແລະ ເອກະຊົນ;
6. ຊີ້ນຳ ແລະ ປະສານງານທາງດ້ານວິຊາການໄອຊີທີ ຂອງບັນດາເມືອງ ແລະ ສະຖານການສຶກສາແຫ່ງຕ່າງໆພາຍໃນແຂວງ;
7. ເປັນກອງເລຂາຊ່ວຍວຽກຂອງພະແນກສຶກສາທິການ ແລະ ກິລາແຂວງ, ນະຄອນຫຼວງ ໃນຄະນະກຳມະການຄຸ້ມຄອງອິນເຕີເນັດຂັ້ນແຂວງ;
8. ພົວພັນ ແລະ ປະສານງານກັບບັນດາຂະແໜງ, ຫ້ອງການສຶກສາທິການ ແລະ ກິລາເມືອງ, ນະຄອນ, ສະຖານການສຶກສາ ແລະ ອົງການຈັດຕັ້ງ ທັງພາກລັດ ແລະ ເອກະຊົນ ຕາມການມອບໝາຍຂອງຂັ້ນເທິງ;
9. ກວດກາ, ຕິດຕາມ, ປະເມິນຜົນ ແລະ ສະຫຼຸບລາຍງານ ການຈັດຕັ້ງປະຕິບັດວຽກງານຂອງຕົນໃນແຕ່ລະໄລຍະ;
10. ປະຕິບັດໜ້າທີ່ອື່ນ ຕາມການມອບໝາຍ ຂອງພະແນກສຶກສາທິການ ແລະ ກິລາແຂວງ, ນະຄອນຫຼວງ;

ຂອບເຂດສິດ

1. ສະເໜີແຜນການ ແລະ ແຜນງົບປະມານ ເພື່ອພັດທະນາວຽກງານທີ່ຕົນຮັບຜິດຊອບຕໍ່ພະແນກສຶກສາທິການ ແລະ ກິລາແຂວງ, ນະຄອນຫຼວງ;
2. ສະເໜີພະແນກສຶກສາທິການ ແລະ ກິລາແຂວງ, ນະຄອນຫຼວງ ພິຈາລະນາ ອະນຸມັດ, ປັບປຸງ, ສ້າງ ຫຼື ຍົກເລີກບັນດານິຕິກຳຄຸ້ມຄອງການສຶກສາ ແລະ ກິລາທີ່ບໍ່ສອດຄ່ອງ;
3. ສະເໜີພະແນກສຶກສາທິການ ແລະ ກິລາແຂວງ, ນະຄອນຫຼວງ ພິຈາລະນາ, ອະນຸມັດ, ສ້າງຕັ້ງໂຮມ ຫຼື ຍົກເລີກໜ່ວຍງານຕ່າງໆ ທີ່ຂື້ນກັບການຄຸ້ມຄອງຂອງສູນ;
4. ສະເໜີພະແນກສຶກສາທິການ ແລະ ກິລາແຂວງ, ນະຄອນຫຼວງ ພິຈາລະນາ ການບັນຈຸ, ຊັບຊ້ອນ, ຍົກຍ້າຍ, ແຕ່ງຕັ້ງ ແລະ ປົດຕຳແໜ່ງພະນັກງານ-ລັດຖະກອນ ພາຍໃນສູນ ຕາມກົດໝາຍ ແລະ ລະບຽບການ;
5. ສະເໜີການຍ້ອງຍໍ, ປະຕິບັດນະໂຍບາຍຕ່າງໆ ຕໍ່ຜູ້ມີຜົນງານ ແລະ ປະຕິບັດວິໄນ ພະນັກງານລັດຖະກອນພາຍໃນສູນ ຕາມກົດໝາຍ ແລະ ລະບຽບການ;
6. ຄຸ້ມຄອງ ແລະ ນຳໃຊ້ ງົບປະມານ, ວັດຖຸ, ຊັບສິນ, ກອງທຶນ ແລະ ທຶນຊ່ວຍເຫຼືອ ປະເພດຕ່າງໆຕາມການອະນຸມັດຂອງພະແນກສຶກສາທິການ ແລະ ກິລາແຂວງ, ນະຄອນຫຼວງ;
7. ຮຽກໂຮມປະຊຸມ, ປຶກສາຫາລື ແລະ ຖອດຖອນບົດຮຽນ ກ່ຽວກັບວຽກງານ ໄອຊີທີ ສຳລັບການສຶກສາ ແລະ ກິລາ ຕາມພາລະບົດບາດຂອງຕົນ;
8. ປະຕິບັດໂຄງການຊ່ວຍເຫຼືອລ້າ, ໂຄງການຮ່ວມມືກັບຕ່າງປະເທດ ແລະ ອົງການຈັດຕັ້ງ ທັງພາກລັດ ແລະ ເອກະຊົນ ຕາມການອະນຸມັດຂອງພະແນກສຶກສາທິການ ແລະ ກິລາແຂວງ, ນະຄອນຫຼວງ;
9. ສະເໜີພະແນກສຶກສາທິການ ແລະ ກິລາແຂວງ, ນະຄອນຫຼວງ, ປົກປ້ອງ, ຄຸ້ມຄອງ, ບຸກຄະລາກອນ, ຊັບສິນ, ລິຂະສິດທາງດ້ານການສຶກສາ ແລະ ກິລາ;
10. ປະຕິບັດສິດອື່ນ ຕາມການມອບໝາຍຂອງພະແນກສຶກສາທິການ ແລະ ກິລາແຂວງ, ນະຄອນຫຼວງ;